المیرا زنجانی، شعیر یازماقا اوزونه (صنم زنگانلی) تخلصین سئچیب و ۱۳۶۲/۰۶/۱۰ گونش ایلینده خالخال شهرینده تحصیلاتلی و اصیل خانواده ده دونیایا گوز آچیب. اونون آتاسی رحمتلیک دکتر محب‌الله زنجانی و آناسی منصوره نصیحی معلییم دیر. المیرا خانیم آتاسینان تاثیر آلاراق شعیر دونیاسینا قدم قویدو. اونون آتاسی شعیر و موغامات هوسکاری دی و حاج بابا حسین اوفی چوخ سئوردی. المیرا خانیمین ایکی لیسانس مدرکی وار و ۱۳۸۰ جی گونش ایلیندن شعر دئمگه باشلاییب. اونون شعرلری اول لر فارس دیلینده یازیلیردی. سونرالار شاعیر تورک دیلینه باغلی اولدوقونا گوره و علی آقا واحدین شعرلریندن ایلهام آلاراق تورک دیلینده شعر یازماقی باشلادی و دکتر حسین شرقی جنابلاریندان و دکتر جمال آیرومی جنابلاریندان شعیر یازماقدا یاردیم آلدی. شاعیریمیز عمرونون ۲۰ ایلین وطنی خالخالدا یاشاییب. سونرا مهندیس آرش تورکمانی لا تانیش اولوب و اونان اولنیب و اورمو شهرینه گلیب. مهندیس آرش تورکمانی اورمو شاعیرلریندن دیر و شعرلرینده یورقون تورکمانلی تخلص ایله ییر. بو ایکی گوزل شاعرین بیر قیز ائولادلاری وار کی آدی آماندا تورکمانی دیر و آماندا خانیم موسیقی هوسکاری دیر و قوپوز سازین گوزل چالار و گوزل طرح لر چکر. صنم خانیمدان بوگونه قدر ۸ کتاب چاپا یئتیشیب. بیری شاعیره میزین اوز شعرلری دی کی صنم خانیم او کتابی آتاسیز گونلریم آدلاندیریب، شاعریمیزین دیگر کتابی آزربایجانین آتالار سوزی کونوسیندا یازیلیب، صنم خانیم بو کتابی دیلدن دیله آدلاندیریب کی ایکی جیلد ده نشر اولوبدیر. و ۵ ترجما کتابی وار دیر کی، بیرین آزربایجانیمیزین دیلینین تاریخینه راجع پروفسور نظامی جعفر اوف یازیبدیر کی صنم خانیم بو کتابی فارس دیلینه ترجما ائدیبدیر و دیگر کتابی ایسه رامیز عبدالله یئوین یازدیقی ۹۹ قارداش آدلی رمانی دیر کی صنم خانیمین طرفیندن فارس دیلینه ترجمه ائدیلیبدیر، باشکا کتابلاردان ایکی حیکایه کتابی وار، بیری سالیده شممد قیزی نین، اریین شمع کتابی، دیگری ایسه نورالدین عدیل اوغلونون آدم و حوا کتابی دیر صنم خانیم اونلاری عرب الفباسی له آزربایجان تورکجه سینه چویریبدیر، سون گونلرده صنم خانیم نور الدین عدیل اوغلونون، بهشت زووارلاری کتابینی دا عرب الفباسی له آزربایجان تورکجه سینه چویریبدیر، بو کتابدا قاراباغین ایکینجی ساواشیندا شهید اولان گئنج لرین یاشام حیکایه سی یازیلیبدیر.