۱۳۴۷-جی ایل قیروو آیی‌نین دؤردونجو گونو تبریز شهرینده دونیایا گؤز آچمیشام. ایلک اوخولو تهران شهرینده اوخویوب، سونرا دوغولدوغوم شهر، تبریزده تحصیلاتیمی داوام ائتدیم.
کیچیک یاشلاردا صمد بهرنگی‌نین حیکایه‌لری ایله، اوخوماغا علاقه گؤرسه‌تدیم. اوندان سونرا داواملی حیکایه و رومان اوخوماق منیم یاشامیمدا اؤنملی بؤلومده یئر آلیمیشدیر. آنام شعر یازماغی گنج یاشلاریندان بری چوخ سئورمیش. آنجاق اؤزل نه‌دندنلردن دولایی یازماغی بوراخمیشدی. بلکه ده شعره ماراغیم آنامدان منه پای یئتیشیبدیر.
ادبیاتا ماراقلی اولدوغومدان، دانشگاهدا فارسجا ادبیات ساحه‌سینده داوام ائتدیم.
اوزون زامان‌دیر اوشاق ادبیاتی ساحه‌سینده یازیب، اوخوماغا چالیشیرام. آغ قانادلی کپه‌نک، ایلک اوشاق شعری کیتابیم ۱۳۹۸-جی ایلده چاپ اوبدو. بو کیتابین رسیملرینی لیدا حشمتی (باجیم) زحمتینی چکیبدیر. ایکینجی اوشاق شعری کیتابیم دا گئنه لیدا حشمتی‌نین گؤزل و دیرلی رسیم‌لری ایله ۱۴۰۰-جو ایل چاپ اولدو. اوشاق حیکایه‌سی یازماق دا سئودیییم و علاقه باغلادیغیم ایش‌دیر. بیر نئچه اوشاق حیکایه‌سی و شعرلریمدن سایین خانیم نواده‌رضی‌نین امکلری ایله سانجاق مهد تمدن، مونجوق صحیفه‌سینده چاپ اولوبدور.
اوندان علاوه نثر و شعر یازماغا ماراغیم واردیر. بیر شعر دفتریم ده «تانرب بویالی ساچلاریم» ۱۴۰۱-جی ایل نظامی گنجوی انتشاراتیندا چاپ اولوبدور.
شعرلریم و یازیلاریم سانجاق مهد تمدن، مهد آزادی، غروب، نامه‌ی صدیق، کؤرپو، خودافرین و... عزیز درگی و قزئته‌ل ده چالیشانلارین امکلری ایله چاپ اولوبدور.
شعرلریمدن بیر نئچه‌سی آذربایجان دا "گونوموزون گونئی ادبیات آنتولوژی‌سی" کیتابیندا چاپ اولوبدور.
"پروفسور اسمیرا فواد" خانیمین امکلری ایله ده(شعر و اوشاق حیکایه‌سی) قیسا بیر تانیتیم 525-جی قزئتده چاپ اولوبدور.
عراق تورکمن ائلی طوز خورماتودا چیخان ادبی «اقصو» قزئته‌سینده سایین سمیر کهیه اوغلونون امکلری ایله شعرلریم چاپ اولوبدو.
حیکایه‌لریمدن "گونئی آذربایجان اوشاق ادبیاتی آنتولوگیاسی"یندا قوزئی آذربایجان‌دا، سایین اوستاد قدیری، سایین فیکرت سلیمان اوغلو و سوسن خانیم نواده رضی خانیمین مصلحتچی‌لیگی و امکلری ایله چاپ اولوبدور.
آنجاق ادبیات ساحه‌سینده، اوخویوب و چالیشاجاغین اوزون بیر یول اولدوغونا اینانیرام و من بو یولون هله باشیندایام.
بیر کیتاب ، بیر چاخماق ...
یوللاردان واغزالا
گؤی قورشاغی دیر بویلانان
سن او صولح بویالارین بنؤوشه سی سن می؟
او یازیلمامیش شئعیر جییه زی
هانسی شهرده ایتیردین ؟
قیز کؤرپوسونده می ؟
یوخسا
بیر تونئلین یادداشیندا ؟
آنجاق بوشلوقلاریمدیر یوخلوغون
داش ماغازالارین قهوه خاناسینین بارداغیندا ،
اریییرم سنی .
سونسوز بیر ساواشدان قاییدان عسگر کیمی ،
تنتیمیش آددیملاریلا ،
هرگون
ماسانین اوستونده بیر کیتاب
و بیر چاخماق
یاناشی بوشالمایان بیر بارداق
دوداقلاریندان سوزولن سمفونییا
ساچلاریمدان اوچوشور داراق -داراق
مومکونسه دوداغیندان منیمه
بیرساریمتول پرده ساخلا...
حئکایه
بوتون پای-بؤلوشلردن
منه قالان اؤزلم اولدو
سانکی
کیلسه لر خاچیندان آسیلان من دییلمیشم
سانکی
بارماقلاریمدان امیزدیرمه‌میشم بو ارکک دونیانی
اته‌ییمده دالغالانان چین دوواری
گؤزلریمدن داشلانان هئراکلیت چایی
یاناغیما سوزولن باش ساری تئل
"سانکی
بیر حئکایه دیر" قادین، قودا، خودا
قینامایین آلچاق دوواریمی
اوُگئی دوغولموشام بلکه!
آزغی سوزولموشم دئیه‌سن
دونیانین باجاسیندان!
بوتون آیه‌لر من‌سیز
کؤیسومده اوچوشان گؤیرچینلر دن‌سیز
من کی گؤبه‌لک یئریکلمه‌میشم مین؛ مین؛
شاباشیمدا دا یوخویدو هیروشیما باشینا سپیلن تویلوق
منه باخ!!!
آی باشیندان بیر دیش قیرتیب گیزله‌دیرم
گیزلی آغریلاریما
گونه باخان تاباغینا چئوریلمک ایستیر اللریم
لالا دونونا گیرمک ایستیر ساری گوللریم
قویولاردا باتمیش بیر سسم
سویوق دادی وئریر بوتون فصیللریم
صولح
کئشگه سسینی داغلارا
نفسینی باغلارا
گؤزل‌لیینی گؤی قورشاغینا پایلاشایدیم
ایستی اللرینی سئوگیلی‌لرین ایلک گؤروشونه
اوره‌یینی
اوغلو ساواشدا یوبانمیش آنانین
ساپ-ساری آستاناسینا
ماوی‌لییینی دنیزلره قوشایدیم
سنی دالغالارلا باغلاشایدیم
آهااااااای
ماهنیلاریمین ساری‌گلینی
بولودلاردان اوزالدایدین یاغیش الینی
اولدوزلاردان گؤز وورایدین
گولومسه‌ین هئیکلینی
جالانایدین قارا قانچیل کوره‌میزین
قیسیر دوداقلارینا
سس سسه وئریب اوخویایدیق
اوزایلار اوزونو
ساچین اوجون هؤرمزلر
گولو قونچا درمزلر ...
بوراسی وطن
بوراسی اؤلکه‌دیر
اؤلمک یئری!!
بورانین قار چیچه‌یی
سون بئشیک باجیم‌دیر
سوبای لالالاری ایسه
قان قارداشیم
بوردا تانری
ساغلیق وئرر اللرینی
بویدا بویدا ایستیکانلارا
گونش مزه‌سی‌له سرخوشلایار
پاییزلامیش دوداقلاری
دایناسور قاش قاباغیندا
گولومسه‌ین قیرمیزی کپه‌نکلر
گونش قادینلارمیش
جهننم گؤمروکویله قازانما منی
ائرکه‌ییم وطنداش!
منی سئوینج سوراغیندا آرا
اؤز قیراغیندا آرا
سانیرام بو کؤنده‌لن کوره‌میزین
قانلی گؤبک‌جییه‌سی
اورتا دوغویا آتیلمیش
بوردا باتان
بوردا ایتن
آنجاق بوغازیما تاخیلسا دا نیشانلیق بلگه‌م
بوراسی آداخلیم‌دیر
بوراسی وطن .....
آرزی
بیر ائویم اولسون
کیراسیز،
بیرده بیر پنجره‌م
دیشاریداکی قیزیل گولون قوخوسو گلسین،
چینار باشیندا قوشلارین نغمه‌سی...
بیر ائویم اولسون
رادیو،
یئر کوره‌سی‌نین بخته‌ورلی‌ییندن،
باریشدان خبر سالسین
قورشونسوز سحردن
باریتسیز آخشامدان
اؤلومسوز بیر گئجه، کابوس سوز یوخودان...
بوتون توفنگلرین،
اوقیانوسون دئو دالغالاریندا باتماغیندان...
بیر ائویم اولسون
ایچینده موتلو بیرعاییله
و
ماسا باشیندا گونش،
ماسا باشیندا ساریشین بوغدالارین تارلاداکی والسی...
دوواریندا موتلولوق چرچه‌وه‌سی...
بیر ائویم اولسون...