1
24 هزیران، 1927. کیسلووودسک.
عزیز و سئوگی‌لی میشکیناز! ایندییه قده‌ر دؤرد‌ـ بئش آچیق مکتوب یازمیشام. ارتوغرولون اوتکریتکاسیندان باشقا بیر مکتوب آلمامیشام. بیلمیرم، جاواب یازماییرسان، یاخود پوست‌خانامی وئرمیر؟ هر‌‌حالدا، بو قده‌ر تنبل‌لیک یاراماز.
دئسم کی، واننال‌لار و ائلئکتریک منده حال قویمامیش، نه‌اینکی اوزون مکتوب یازماق، حتی قیساسینا دا ارینیرم. داها دوغروسو، مشهدی عیباد کیمی آدیمی دا اؤزگه‌دن سوروشورام. واننا‌لار بوتون‌ـ‌بوتونه اعصابی و حافیظه‌نی برباد ائدیر. آز قالمیش کی، تداوی پروگرامیمی یاریلاییم، بوگون‌ـ‌یارین قوللوغونوزدایام. چوجوق‌لاردان موغایات اوْل! ارتوغرولا سؤیله کی، گؤزو تورانجیغین اوزه‌رینده اولسون، ساواشماسین‌لار، یوخسا آجیق ائدیب بیر یوللوق مَرده‌کانا گلمه‌رم. چوجوق‌لاری منیم طرفیم‌دن اؤپرسن…
حسین جاوید
2
30 یون، 1927. کیسلووودسک.
میشکیناز! بو گون اوچونجو مکتوبونوزو آلدیم کی، ارتوغرول ایله برابر یازمیشدینیز. چوخ ممنون اولدوم. کئچن گون دوکتورون یانیندا ایدیم. اوچونجو دفعه موعایینه ائتدی. یئنه نارزان و ائلئکتریک و دیگر عیلاج‌لار یازدی. دوکتورون فیکرینجه، اییولون ایییرمی‌سینه قده‌ر تداوی بیتر، سربست اولارام. من بیر ده دوکتورا گئده‌جه‌یم. پروگراما بیر شئی علاوه ائتمه‌سه، آیین ایییرمی‌سینده چیخاجاغام، چونکی غریبسمه‌یه باشلادیم، تانیش دا چوخ آز… پناه بَی ده دونن یوخ، سراغاگون گلدی. کیسلووودسکین یاغمورلاری داد‌ـ‌بیداد ائله‌ییر. دیشاری چیخماق مومکون دئییل. یئنه بئش‌ـ‌آلتی گیرونگه کؤکلدیم. پروفئسسور، قطعیین یاراماز — دئیه، آج بوراخیر. گوندوز یاتماغا هئچ قویماییر. گلن دفعه آیریجا ارتوغرولا شکیل‌لی اوتکریتکا یازاجاغام، بو دفعه باغیشلاسین. چوجوق‌لاری اؤپورم. ارتوغرول حلیمه‌نین ده درس‌لرینه باخسین…
سنی اؤپورم.
جاوید
کؤچورن: ایواز طاها
anlam.biz