علي رضا اردبيلي: 

بو مقاله بٶيوك اوستادييميز دوكتور جواد هيئتين دونياميزي ترك ائتمك ندنيله تكرار نشر اولونور  

اوستاد محمد علي فرزانه­نين يوبلئي­ايدي. جناب دوكتور هيئت ده مراسيم­ده ايشتيراك ائديردي. اصلينده من ايسوئچ­جه بير چيخيشيم اولاجاق­ايدي و بو چيخيش­ين سٶزلريني اوزاقدان گلميش قوناخلارا ايضاح ائتمك مسئوليتي­ ده منيم بوينوما دوشوردو. بو ايضاحات آمما تام باشقا بير يٶن تاپدي. مجليس­ده ايكي قوجامان اوستادلارلا برابر داها گنج وارليقچي­لار نسلي­نين نوماينده ­سي اولان جناب علي رضا صرافي ده ايشتيراك ائديردي. دئمه ­لي مجليس ده، وارليق مكتبي­نين،­ هر آذربايجان ميللي ييغينجاغيندا دويولان معنوي حضورو، بو اوچ ضيالي­نين حضوروايله ماديت تاپميشدي. بو ايسه منيم توركجه اولان سٶزلريمين اٶز كونسئپتدن كنارا چيخماسينا باعيث اولدو.

اوزون ايللر دونيانين بو باشيندا، بيز تهراندا نشر اولموش وارليق و وارليقچي­لارين سايير اثرلريني اوخوياركن، اونلاري ياراديب عرصه­ يه چيخارانلارا اولان دويدوغوموز سايقي و سئوگي­لريميزي گيزلي ساخلاميشديق. او آغير ايللرده توتاليتر رئژيمين لوغت كتابيندا، "خارج" مدخلينه، چوخ يوروملار داخيل ايدي. بونونلا بئله، هميشه حيس ائديرديك كي بيزيم اونلارين ايشلرينه وئردي­يميز ديردن اونلار بيخبر دئيرلر. آلكساندر دوبچك ايكينجي پراگ بهاري جريانيندا، بو شهرده مٶحتشم بير توپلانتي­دا اٶز ميلتينه قارشي خفاده داشيديغي محبته ايشاره ائدركن، علاوه ائتدي: بو ايللرده سيزده بيليرديز كي، من­ده سيزي سئويرديم. دئمه­ لي بو محبت­ين ايكي طرفي­ ده اوندان خبردار اولموشلار و بو "سر" بلكه ائله "اوچونجو طرف"دن، قارانليغي قورويان مأمورلاردان گيزلي قالميش، آمما، يوخ! اونلار دا يقين مين بير كانال­دان بو "سر"دن خبردار اولموشدلار. بس نه قالير؟ دئمه­ لي بو سئوگي تكجه ديله گلمه ­ميشدير و هم دوبچك و هم چك و سلوواك ميللتلري و هم توتاليتر حاكميت هر زامان بو مسئله­ ني بيلميشلر. بو سببدن آلكساندر دوبچك. گٶز ياشلاريلا اٶز گيزلي ساخلاديغي سئوگي­سيني ديله گتيرركن، امين ايدي كه خالق اوچون بير سر آچمير و ساده­ جه معلوم بير فاكتي ديله گتيرير. آمما ائله بودا، آچيق-آشيكار اعتيراف اولونماميش سئوگي­لرين نيطقي بيانه گلمه­ سي­ده كيچيك بير سعادت دئير.

 

او گئجه و او مجليسده من ده باشقا ايشتيراكچيلار كيمي، وارليقچي اوستادلارا توكنمز سايقي و سئوگي­لريمي بيان ائدركن، تام آرخايين ايديم كه اونلار هر زامان اٶز وارليغيني درك ائتميش هر بير آذربايجان توركونون اٶزلرينه قارشي هانسي حيسلري اوركلرينده داشيديقلاريندان خبردار اولموشلار. يقين كي قارانليق قووه­ لري­ده مين بير كانال­دان و حتي ائله ساده بير سيرا آناليزلردن، بو مسئله­ ني بيلميشلر و بو آرادا يئني ساييلا بيلن، ائله بو سئوگي­ نين اوركدن، ديله جاري اولماسي و دوشونجه­ دن سٶزه چئوريلمه­ سي­ايدي. 

تهران كيمي بير محيط­ ده اوزون ايل لر "بير قوجامان داغ كيمي درياده دوروب" و مدنيتيمزي قوروموش اوستاديميزه، ايندي قوزئي پايتختيميز ائو ييه ­ليگي ائدير. بٶيوك اوستاد ايندي آرتيق نئچه ايلدير كي اٶز حيات يولداشيلا، سيد جعفر پيشه ­وري، محمد امين رسولزاده و اوزئير حاجي ­به ­يليني اٶز قوجاغينا آلميش افسانه­ وي باكي­نين ساكيني­دير. بوگون بوتون مادي و معنوي اينكيشافي دٶورلري­نين ان قيزغينلاريندان بيريني ياشايان باكي، اوستاديميزه ائو صاحيبي اولماقلا دا فخر ائده بيلر.

ميلتيميز قوزئي­ده آزاد اولدوغو كيمي زامانلا اٶز گونئي­ينده ده آزاد نفس چكه­ جكدير و طبيعي بير پراسئس كيمي درگي­لر و يازيچيلاريميزين سايي، دونيانين گليش ميش ميللترينه نورمال ساييلان بير سويه ­يه چاتاجاقدير. آمما اونلارين آراسيندا وارليق كيمي بير درگي و دوكتور هيئت كيمي بير ادبي، ايجتماعي و ميللي بير شخصيت اولاجاقمي؟ عجبا بوتون بو ايللرده آذربايجان موسيقي ­سي ­نين هر طرفلي اينكيشافي شراييط­ينده بير ليلي مجنون اوپراسي يازان وارمي؟ بير اوزئير حاجي­ به­ يلي نئجه؟

اوستاد هيئت بير چوخ طرفدن حاقلي اولاراق "زمانه­ ميزين قورقودو" آدينا لاييق گٶرونموشدور. آمما منجه دوكتور هيئت هر هانسي بير شخصيت­دن آرتيق ائله اوزئير حاجي به­ يلي­ يه بنزر بير ايش گٶرموشدور. بير ميلت اوچون ساده موسيقي اثري يارادماق يوخ، اٶز ياراديجي­ليغي­لا بير ميلتين موسيقي مدنيتي­ني معاصرلشديرمك­ده تك باشينا موفق اولموش بٶيوك اوزئير كيمي، اوستاد هيئت ­ده 1358-ده تهراندا تأسيس ائتدي­يي ادبيات و مدنيت اوجاغيله، ميللي حوكومتين مغلوبيتيندن سونرا يارانميش ميللي حركاتين يئني دالغاسي­ نين يارانماسينا لازيم اولان فوندامنتال ايشلره باشلادي. بو تاريخي لاييحه ­نين موفقيتله حياتا كئچمه ­سي و اونون بركتيندن گنج نسلين آراسيندان توتاليتر ايدئولوژي­لره باغلي اولمايان، مينلرله ميللي كادرين يئتيشديرلمه­ سي، قوزئي آذربايجانين آزادليغيني قارشيلاماق و اوندان دوغان هيجان دالغالاريني اينتلكلتوئل فعاليت­لر، درين و متين ميللي حركاتين مجراسينا سالماغي مومكون ائتدي. قوزئي آذربايجان ايكينجي جومهوريتيني قوراركن، آرتيق گونئي­ده چوخ اساسلي بير ميللي مفكوره و بو مفكوره ­ني يايا بيلن ميللي كادرلار وار ايدي و بونلارين ان آزيندان ايلك نسيل­لري "وارليق مكتبي"نين يئتيرمه­ لري ايدلر. بو يئتيرمه­ لر ياد ايدئولوقلارين اويدوردوقلاي قوطب­نومالره و قالديرديقلاري ماياك­لارا استهزايله باخيرديلار. تورك و آذربايجان كيم­لي­يي بو نسل اوچون بير اورقانيك وحدت تشكيل ائديردي داها يادلارين بيزه بويوردوغو كيمي، بو ايكي وارليقدان بيري دوغما بيري ياد دئيردي. بو آرادا گٶزله قولاق يا عقل­له حيسيات آراسيندا ضيديت اعلان ائديب بيزي اونلارين بيريندن ايمتناع ائتمه ­يه چاغيرانلارين، چاغيريشلاري­دا، لعن و نيفرينلري­ده جاوابسيز قاليردي. آذربايجان توركو اٶزونو تانيماقدا داها ياد مكتبلر و ياد دايه­ لره ائحتياج دويموردو.

 

چوخ سئوينديرجي حالدير كي، بٶيوك اوستاديميز، هم قوزئي­يين آزادليغيني گٶردو و هم گونئي­ده حق عاشيقلري­نين اون مينليك، يوز مينليك و حتي مليونلوق مارشلارينا شاهيد دير. اٶتن ايل (گونئي آذربايجان قلم انجومني­نين يارانماسيلا باغلي) تريبون سايتندا توركجه و فارسجا نشر اولموش ايكي بياناتين توركجه ­سيني 6892 نفر و فارسجاسيني 7207 نفر اوخوموشلار. اگر بو رقملرده غيري تورك اوخوجولارين پاييني نظره آلساق، تورك ادبي و يازيلي ديلي­له باغلي، آذربايجانلي­لارين آراسيندا آز بيز زاماندا مدني بير رنسانس­ين باش وئرمه­ سيني ايديعا ائده بيلريك.

سون ايللره ميللي حركاتين چوخ تمكينلي و اومود وئريجي اينكيشافيني گٶرن هر بير كس، بو حركاتين ايده­ يا تاريخي، و نظري تمل­لريني آراياركن، 1358-جي ايل و تهران شهرينه گئديب چيخماسي چوخ طبيعي ساييلمالي­دير. اٶز گونده ­لي­ ييني اٶزو معين لشديره بيلن و هيجان دالغالاري و سهو آدرسلر آرخاسينا دوشمه­ ين ميللي حركاتيميز، بوگون داها بير دفعه اياغا دورب، اوزونو، اٶز اوزئيرينه توتوب اونا آلقيشلار ياغديرمالي­دير. بعضا داخيلده و داها آرتيق حال­لاردا خاريجده، واخت آشيري معلوم و نامعلوم نيتلرله باشلايان كامپانيالارين يايماق ايسته­ ديكلري غيري دمكراتيك شعارلار و استانداردلاشديرما جهدلري­نين اوغورسوز قالمالاري، بيزي امين ائدير كي، ميللي قورتولوش حركاتي­نين حاضيركي دٶورو يالنيز غلبه ايله نتيجه­ لنه بيلر.

 

 

 

 

تاريخ باخيميندان هم 2 و هم 3 اون ايل­ليك اوزون زامان ساييلا بيلمز. آمما شاه رئژيمي­نين دئوريلدي­ييندن بري كئچميش ايللر، آذربايجان اوچون ميللي ديرچه­ليش ايللري اولموشدور و سٶزسوز كي، بو نائليت­ده گونئي­لي - قوززئيلي بوتون ميلتيميزين و مدني اينستيتوتلاري­نين پايي واردير. آمما اگر ميللي مدنيتيميزين ديرچه­ليشي و ميللي قورتولوش حركاتيميزين اينديكي دالغاسي­نين تمل­ ايشلري­نين، چئشيدلي مدني لاييحه­لر چرچيوه­سينده، اورقانيزه اولوب حياته كئچيريلمه­سينده زاماندان ايره­لي­ده حركته باشلاميش بير اوجاق و بير شخصيت آديني اوجا توتماق ايسته­سك، بو ايكي شرفلي يئرلر تاريخيميزده بير معنالي اولاراق وارليق مكتبي و دوكتور جواد هيئته مخصوص اولاجاقدير.




"20 ياشيندا بير مكتب"

وارليغين 20-جي يوبلئي­له باغلي يازديغيم مقاله نين لينكي

مقاله­نين آدي "20 ياشيندا بير مكتب"دير كي تريبون درگي­سي نين 4-جي ساييندا 1999-جي ايلده نشر اولموشدور. بو لينكده اينترنتده مٶوجود اولان وئرسيا، اصلينده زرنگار فايلي كيمي ايدي و سونرا HTML فورماتينا چئوريلركن، متن ده بير نئچه كيچيك ايملا سهولرينه بنزر دئيشيكليكر عمله گميشدير.