شعر

ای اولان یوخسون کلامی منطیق و بورهانیدن
وزن وبحری سیر-سینیق، هذیانیدن بٶهتانیدن


نظم و
ربطي، بحثی موضوعیله دخلی اولمایان
لفظی یونگول، صرفی آخساق، بوش کلامی دولمایان

ایدديعاسی مغلطه، تصویري افکاری حقیر
شککیده بولموش یقین، زنجیري اوهامه اسیر

نعمتي رسم و ادبدن بهره­سیز قیلمیش اؤزون
عدل و اینصافی اونودموش گئرچه­یه یومموش گؤزون

 

قیسسا گلدیکده ایپی، الده سیلاحي ایتتهام
سونرا تفسیري خیانت، بابي تحمیقي عوام

 


دوشمن ایله اؤز-اؤزون تعریف و تصویر ائیله­ین
باب استحماریله تنویر(!) و تزویر ائیله ین


بو سیزایدیز، باش ایه­ن راحیل ایمامین امرینه
سؤزده اولسازدا غنیم افیوني ايسلامه، دینه


دوشمنیز "خلق موسلمان"، رهبریز معدوم ایمام
یاوریز پاسدار سپاهی، مقصدیز حيفظي نظام


شرق و غربین داعواسیندا باغلی گؤز سربازلار
وار یوخون قویموش اودوزموش جیبهه­ده جانبازلار


اوندا کی اولدو جهننم ساندیغیز جننت باغی
رهبري موستضعفین مغبون قیلدی اورتاغی

اوندا کی چٶکدو بینادن کاخي درگاهي شومال
آچدی دوشمنلر قوجاغین، غربده تاپدیز مجال


جیددو جهدیزدیر آلینسین دٶوردن چیخمیش مالیز
سیزده وارسیز سؤیله سینلر، میزانا دوشسون حالیز


سیز برئژنف، استالین، صددامی تحسین ائیله ین
خوشلایان قذافی­نی، مدحي خمئینی سؤیله­ین


سیز مریدي مرجعي مرحومي دیني بولشوویک
سیز اسیري شککي مزمن وهمی قات قات اوسته لیک


عقل میزان ایسه قیلمیش ایرینی دوزدن تمیز
اولموش آیدین ایختیلاف و ایفتيراقي سیزله بیز


تاریخی تقصیرینیز یاخشی بیزه عایید دئییل
قیلسادا بیر کیمسه شوبهه اولدو آخر موستحیل


ائتدینیز آیدین سونوندا اسگی یولدا یولچوسوز
استالینیز یوخسادا، یولداش چاوئز تک سولچوسوز