شعر

اسماعیل جمیلی:

کور بوراخیب توتدوغونو گؤزلو گؤزل بوراخماییر
ترکه جهان وهم ائدیب نقشه عیانه باخماییر
آغ قارا خیر وشر گؤرن گؤزگوسو گؤزده دیر هله
مرحوم اولان یوروملارین خوطبه سی سؤزده دیر هله
یئتدی طلاق آلانلارین توی سؤزو بیزده دیر هله
یولچوسو اسگی یوللارین بیر کره ده کاریخماییر


آرشینی قیسسا گلسه ده عالمی اؤلچمک ایسته ییر
ان سیزی بویسوز اولسادا بیر داها بیچمک ایسته ییر
سالدیغی کؤرپو چوکسه دا بیر داها کئچمک ایسته ییر
دوگملر ایچره فیرلانیر دؤنسه ده باشی بیخماییر

توشلادیغی وعده اوخو یوز کره دیسه ده داشا
چینقیلا داش قاش دئسه ده ایندی دئییر بئز قوماشا
کئچمیشی چاش باش اولسادا وورماسادا یولو باشا
هئی میتیلین چوورتدورور جانینی اسگی سیخماییر

تاهلی بزه کلی سؤزلرین پوز بویاغی دیلینده دیر
پاسلی قینیندا شمشیری کسمه سه ده بئلینده دیر
عرصه نی تنگ قیلماغا قامچی قلم الینده دیر
دؤنگه لرینده دویغونون سانکی دونوبدور آخماییر

مرجعی مرحوم اولسادا میییته باقیدیر هله
چاره نی چاره سیز قالیب اسگیده آختاریر هله
دوشسه ده پرده دن تئلی کؤکله مه دن چالیر هله
ریتمینی هی دئییشسه ده یالنیشی دوغرو چیخماییر

شیشه یه قلبی تئز سینار کیم اولا ناقید سؤزونه
یار اولا معتریض گلر یاغی وموغریض گؤزونه
تابعه امر آختاریر یا کی موقللید اؤزونه
ائتدیی امر ونهی دن مستان اولور سینیخماییر

اویسادا اویدورمالارین حیله سینه جفا سینا
سؤزله بزه نمیش یالانی آلسادا جان باهاسینا
ذره جه شکک ائتمه ییر سهو اولان ایدعاسینا
چون سؤزو بیردیر کیشینین وعده خیلاف چیخماییر
ترک جهان وهم ائدیب نقش عیانه باخماییر

 

اسماعیل جمیلی