شعر

آی آدینین کؤلگه سینده

یاز عطیرلی خیاللاردا

چیچک لنن آرزیلاریم

آی سنسیزلیق سزاغیندا

خزان اولان یوزلر یازیم

گل.......

باخیشلاریم سریلیبدیر یوللارینا

گله جییم تاپشیریقدیر قوللارینا دوداقلاردان آیریلمازدیر ایسته یین

بوینو بوکوک تارلالاردیر

نیسان کیمی گلیشینی گؤزله ین

یانان سئوداندیر شفقده اریین

وقتسیز آخشاملار

یورغون قوشلار

سنی اونودماسین دئیه

قارانلیق قودورماسین دئیه .

گل سئوگلیم دوزلر اؤزلور

جیران جویور باخیشینی

داغلار تانیر سنله آچان

سولماز چیچک ناخیشینی

گؤروشونو سالخیم سویود

بولاغ باشی کؤلگه سینده گؤزله مه ده

لاله لرین قیزیل جا می یوللارینا دوزولمه ده

وورغونلارین وارلیغینی حسرتیله اؤزله مه ده

گل

سنلی آچیلان گولوشلر

سنلی پارلایان باخیشلار

سنلی آلینان اؤپوشلر

یاشایشین قایناغیدیر

موتلولوغون قایماغیدیر

سن اولان یئر

اولدوزلارین دوراغیدیر.

آزلیغندا

آزالمازدیرایسته یین

یوخلوخوندا

سیلینمزدیر دیله یین

گل قاداسی

گل سئوگیلیم

کلبکلر بویانسینلار

گل کندیرلر اوتانسینلار

دوستاقلاردان

قیزیل گوللر بویلانسینلار

گل اوشاقلار

بولودلارا ال ساللاسین

یئریکله ییر اووج اووج

یاوان تورپاق گؤروشونه

تامارزیدیر دوداق دوداق

یاساق دیلیم دئییشینه

گل

سئویملی یارینلارا

بیزی گؤتورسون اویاقلیق

گل گول آچسین بو قوراقلیق

گل اوزونه حسرت ائلیم

یاز یئلی وئرسین قوناقلیق

گل سئوگیلیم ،گل قاداسی

گل آزادلیق

اسماعیل جمیلی