داخیلی

    هر اؤلكه ده اولدوغو كيمي ايسوئچ­ده ده، اتنيك لوببي قوروپلاري مؤوجوددور. كورد و فارس قوروپلار بونلارين ان آكتيولريندنديرلر.

ايرانين غيري فارس و غيري كورد سياسي قوه­لري آمما سون 10 ايل عرضينده ايسوئچين سياست عالمي­له كونتاكتا گيريبلر و بو باخيمدان فارسلار و كوردلردن هله ده گئري ده قاليرلار.  سون ايللرده ايسوئچين پارلامنتينده ايكي سئمينار، واخت آشيري ايسوئچ مطبوعاتندا گونئي و قوزئي آذربايجان مسئله­لري­نين عكس اولونماسي، ايسوئچ پارلامنت عوضولري­نين بيرچوخونون، ايراندا آذربايجانلي­لارين حاقلاري­نين تاپتالانماسيني محكوم ائدن بير قانون لاييحه سي و بير بياناتين وئريلمه­سي، 2009-ين نويابر آييندا ايسوئچين پارلامنت عوضولري و تانينميش سياستچيلريله "صاباحكي فئدرال ايران" مؤوضوعلو يوخاري سويه­لي بير سئمينار و بير سيرا ديگر كونتاكتلار و ايش بيرليكلريني بو سيرادان اولان فعاليتلرين سياهي­سينه يازماق اولار.


  سون 8 آيدا، ايراندا رژيمه قارشي قالخميش اعتراض آكسيالاري زماني فارس قوروپلاري نين بوتون چئشيدلري: ساغچي سلطنت طلب­لر، چوخ ساييلي سول قوروپلار. خالق موجاهيدلري، ياشيل­لار و سايير جريانلار بو آيلارين عرضينده ايسوئچ ايجتيماعيتي و سياست مئيدانيندا، "دموكراسي قوشونو" كيمي تقديم اولدوغو حالدا، آذربايجانلي­لار، كوردلر و ديگر غير فارس ميللتلر مئديال و سياسي ديقت­ مركزيندن كناردا قالميشلار. بو باخيمدان "فئدرال ايران ميللتلري­نين كونقرسي"نين 22 بهمنله باغلي اعتيراضلارا دعوت مضمونلو بياناتي اساسيندا، بو تشكيلاتين ايسوئچ قولو دا 11 فئورال تاريخينده، استوكهولم شهرينده كئچيريلن چوخ ساييلي اعتيراض آكسيالاري­نين بيريندن حيمايه ائتمه­يي مصلحت گؤردو. قئيد ائتمه­لي­يم كه اوگونو يعني 11 فئورال، استوكهولمدا سولچولار و سلطنت طلب­لر، ترتيبله ايران سفيرليگي­ و ايسوئچ پارلامنتي­نين قارشي­سيندا اعتيراض آكسياسينا دعوت ائتميشدير. استوكهولم شهري­نين مركزينده موختليف جريانلارين بيرلشمه­سيني تمثيل ائدن "جمعيت پشتيباني از مبارزات مردم ايران" آدلي موقتي بير قوروم بير آكسيا تشكيل ائتميشدي. بو اعتيراض نوماييشينده ايسوئچين پارلامنتينده حضورو اولان سياسي پارتيالاردان، سول پارتيانين رهبري لارش اولي  Lars Ohly ، خالق ليبرال پارتياسي­نين كاتيبي ائريك اوللنهاق Erik Ullenhag  ، ايسوچ سوسيال دموكرات پارتياسي نين، پارلامنت­ده خاريجي سياست  كاميسياسيندا نوماينده سي كارين حاق karin Hgg، ايسوئچ ياشيل لار پارتياسيندان، پارلامنتين آدي چكيلن كاميسياسي­نين عضوو بوديل سئباللوس Bodil Ceballos ، ايسوئچين "قلم  كلوبو"ندان ماریا مودیگMaria Modig

 و تانينميش وكيل كنت لوئيس نوماييشين ايسوئچلي چيخيشچي­لاريندان ايديلار. بونلاردان علاوه چوخ بؤيوك مئديا منسوبلاري بو آكسيادا حاضيرايديلار.

شكيل­ده گؤروندويو كيمي
"فئدرال ايران ميللتلري­نين كونقرسي"نين ايسوئچ شعبه­سي بو نوماييشده اينگليس ديلينده حاضيرلانميش ايكي چوخ بؤيوك (5 مئتير 2 مئتيره) باندرولدا "قلوبال بير دونيادا، دموكراتيك و فئدرال بيرا ايران اوچون"، هابئله "دموكراسي، سكولاريسم، پلوراليسم" شوعارلاري و عوضو تشكيلاتلارين آديله ايشتيراك ائتدي.

كونقرسين بو اعتيراض موناسيبتيله اؤز حضورونو گؤسترمك، ايسوئچين سياسي رهبرلري و ايسوئچلي و غيري ايسوئچي مئديا طرفينددن موثبت قارشيلانديغي حالدا، استوكهولمون فارس محفيل­لرينده و فارس ديللي راديو وئرليشلرينده چون حيدتلي موباحيثه­لره سبب اودلدو.  هيجانلا اؤز اعتيراضلاريني "جمعيت پشتيباني از مبارزات مردم ايران" و اونون سؤزچوسو مهرداد درويش پورا بيلدينلر عومويتله بير طرفدن ايرانين بايراغيندا "شير و خورشيد"ي  "
IRAN" سؤزو ايله عوض ائتمك و باشقا طرفدن "تجزيه طلبلر"، "فدراليستلر"، "ناسيوناليستلر"، "حاملان پرچمهاي بيگانه" (كورد تشكيلاتلاري­نين بايراقلايني نظره آليرديلار) و داهادا پيس لقبلرله آدلانديقلاري قوروپلارا مئيدان وئرمكده تقصيرلنديريديلر و هله ده بير هفته بو نماييشدن سونرا بو موباحيثه­لر دوام ائدير. البته كونقرس­ين ايسوئچ بؤلومو، يوخاريدا شرح ائديلن كيفيتله بو تدبيرده ايشتيراك ائدركن بئله موباحيثه­لره مئيدان وئريله­جي­ييني ده ائحتيمال ائديردي، آمما ايسوئچ سياستچي­لري، مئدياسي و ايجتيماعيتي­نين بوگون ايران مسئله سينه سون درجه فوكوس اولماسيني نظره آلاراق، ان دوزگون و ان اوپتيمال آدديمي آتماغا قرار وئرميشدي. ائله بو سببله ده حاضيرلانان باندروللار، يالنير اينگليس ديلينده چاپ اولموشدولار. ايسوئچ پارلامنتي نين بوگون 17 فئورال تاريخينده خاريجي سياست مؤوضوسوندا ياريم گون دوام ائدن موباحيثه­لرينده ايران مسئله­سي بؤيوك يئر توتوردو و ايران مسئله­سيني، ايران آزليقلاري­نين مسئله­سيله باغلايان ميللت وكيللري­ده آز دئيلديلر. بير نئچه ايل بوندان اول بو مسئله تصوور اولونان دئيلدي و ان اوزاغي ايران كوردلري حاقيندا كيچيك بير ايشاره  اولا بيلردي. بو موثبت فرق البته داخيلده غيري فارس ميللترين موباريزه­سي باهاسينا عمله گلميشدير و ائله بو فاكت اؤزوده ايسوئچده (و ديگر غرب اؤلكه­لرينده) فعاليت ائدن سياسي قوه­لرين بوينونا، داخيلده گئدن موباريزه­نين سسيني و ايستكلريني چاتديرماق اوچون آغير بير وظيفه قويور.