داخیلی

    علي رضا اردبيلي  این آدرس ایمیل توسط spambots حفاظت می شود. برای دیدن شما نیاز به جاوا اسکریپت دارید    

 سون زامانلار بير سيرا آذربايجان آكتيويستلري طرفيندن اؤنملي بير مسٸله قالديريلميشدير: يٸني بير بايراق ديزايني. مسٸله­نين اطرافيندا چوخ سؤزلر يازيليب٬ موباحيثه­لر اٸديلميشديرو بو يازي­دا من بو مسٸله­يه توخونماق قصديم يوخدور. بوتون بو پراسٸس اؤز نؤبه­سينده داها اؤنملي بير مسٸله­ني نوماييش اٸتديرميش­دير: عوموم ميللي قرارلار وٸرمك مٸكانيزملري.  

 

ميللي بيرليك­دن هم گٸنيش آنلامدا٬ يعني ميللت سويه­سينده و هم ميللي حركاتين چرچيوه­سينده مؤجود اولان سياسي آخين­لار و اونلاري تمثيل اٸدن تشكيلاتلار و فيكير صاحيبلري آراسيندا دانيشماق اولار.  بايراق مسٸله­سي اصلينده گٸنيش آنلامدا و ميللت سويه­سينده تارتيشيلمالي بير مسٸله­دير. موعاصير دونيادا بايراغين هر ميللت اوچون ان قاباريق سيموول اولدوغونو نظره آلساق٬ مسٸله­نين جيدي­ليك درجه­سيني ده تصور اٸده بيلريك. چوخ ميللتلرين بايراقلاري٬ اونلارين ميلي ميتولوژي و تاريخي ديرلر و سيمووللارينا دايانماقلا٬ ان گٸنيش ميللي مشروعيت صاحيبي اولان٬ ان عالي قانون وٸريجي اورقان طرفيندن  معين­لشميشدير. بوگون بوتون دونيادا  آذربايجاني تمثيل اٸدن بايراق دا اٸله بو ساياق بير پراسٸس­ين محصولو دور.

 

موباحيثه­يه قاتيلان فيكير صاحيبلري­نه گلديكده­ايسه ماراخلي بير مقام اونلارين ايمضالاري­نين بير چوخونون (منيم سايديغيم و بيلدي­ييمه گؤره 25 دن 20 ـ سي يا 80 فاييزي!) هانسي حقيقي يا حوقوقو شخصه منسوب اولدوغو بللي دٸيل­دير.

ايندي گونٸي آذربايجاني تمثيل اٸتمك اوچون بير بايراق ديزايني مسٸله­سيني گؤتور ـ قوي اٸدن پراسٸس هانسي مشروعيته دايانير؟ ايلك تشبوث­ 7 ايول 2008 تاريخلي بير يازيدا آرايا قويولموش دور.([1]  [1]  ) 30 ـ 40 ميليون­لوق بير ميلتين ان اولوي سيمولو حاقيندا موباحيثه و قرار وٸرمه­يه چاغيران متن٬ تورك ديلي­نين قايدا ـ قانونلاري باخيمندان اوره­ك آچان دٸيل. بو يازي باشدان ـ باشا٬ ادبي٬ اينشا و ايملا سهولريله دولودور. دٸمه­لي بير ميللت­ين ان اؤنملي سيموولونون طالعيني معين­لشديرمك تشبوثو٬ او ميللت­ين ديلينده بير سطير سهوسيز سؤزو٬ كاغاذ اوستونه ثبت اٸده بيلمه­ين شخص يا قورومون طرفيندن گؤستريلير. ايلك باخيش­دا بوردا بير قباحت­لي بير ايش يوخدور. اؤز ديلينده نه اينكي سهو يازان٬ حتي يٸرلي ـ ديبلي يازا بيلمه­ين شخصلري­ ده٬ اؤز ميللي آتريبوت­لاري­نين طالعي دوشوندورمه­لي دير. آمما مؤسسلر مجليسي يا ايستيقلال و قورتولوشون صاباحيندا يارانميش­ پارلامنتلرين ايشي­نين بوگون هارالاردان آرايا آتيلماسي­ني گؤرمك ­ده آذربايجان توركونون كؤنلونو آچمير.

ايلك چاغيريش­ين مضمونو آمما٬ اونون ادبي كيفيت­لريندن­ ده٬ آرتيق حٸيرت دوغورور. اوردا اوخويوروق:

  ˮآذربايجان، و اؤزلليکله ده گونئي بؤلمه سي بو گون او دورومدا دييلدير کي چئشيتلي تشکيلاتلارين يارانماسينا ايزين وئرسين...، “

  ˮتشکيلات ياراديب و اونا بايراغ ياراتان شخصلر گله جکده اؤز ايشلري نين مسئولييتين داشيياجاقلار. “

  ˮبايراغ مسئله سي ياخين گونلرده بير دفعه ليک چؤزولمه ليدير. اوندان سونرا، سئنئر (مرز) و اليفبا قونولاري گوندمه چيخاريليب و چؤزولمه لي اولاجاقلار.“

 

بو سطيرلرين بيرمعنالي الدوغونو باشا دوشمك بؤيوك ايستعداد طلب اٸتمير.  اونلاري آذربايجان توركجه­سيله آشاغي­دا كي كيمي ده٬ ايفاده اٸتمك اولار:

  1. موختليف تشكيلاتلار يارادماق قدغان اولور!
  2. اؤزباشينا­ليق اٸديب٬ تشكيلات ياراديب و او تشكيلات­لارا بايراق  يارادان­لار٬ مسٸوليته جلب اولاجاقلار!
  3. بايراق مسٸله­سيني بير نٸچه (ياخين) گونلرده حل اٸتديكدن سونرا٬ آذربايجان سرحدلري­نين موعين­لشمه­سي و اليفبا مسٸله­سي ده گونده­ليگه چيخاريليب٬ حل اولاجاقدير!

 

 

داها مارخلي بير مقام­دا بيردن ـ بيره 6 عالي تحصيل اوجاغي­نين   ˮجمعي از دانشجويان“ ـ  ي طرفيندن٬ بو چاغيريشا لببيك دٸمك­دير. عجبا بو 6 اينستيتوت طلبه­لري­ حقيقتاً بير سطير دوزگون توركجه يازا بيلمه­ين و غير دموكراتيك هده­لر و قارا ـ قورخو گلمك­لره دولو اولان يازيني­مي گؤزله­ييرميشلر؟ بو 6 اينستيتيوتون هره­سيندان بير طلبه­نين مستعار آديني بيلن وارمي؟ آيا ميللي حركات­ سيرالاريندا آديني بيلدي­يميز شخصيت­لرين بيري٬ بو 6 اينستيستوت­ون٬   ˮجمعي از دانشجويان“ ـ  ينين ايمضالاري­نين دوزگون اولدوغونو تأييد اٸده بيلرمي؟

 

يوخاريدا ترسيم اولان منظره­نين آجيناجاقلي و تأسسوف دوغوران اولدوغوايله برابر بير سيرا سوآل­لاردا دوغورور:

 

  1. سون 20 ايلده اون مينلر اولماسادا٬ كيم­ليگي هاميا معلوم اولان مينلرله قلم و فيكير صاحيبي٬ آذربايجان مٸدياسي­نين يوزلرله اورقانلاريندا٬ اثر يارادميشديرلار و آرتيق تورك ديلينده دوغرودوزگون نثر يازماق بير غيرعادي هونر ساييلمير. عجبا بو عظمت­ده كولتورل قوشونو اولان بير مللت­ين بايراغي يوخاريدا ايشاره اولان يوللارلا معين اولمالي­دير؟ ماراخلي دير كي يازي­لارين بير سيراسي فارس ديلينده دير.
  2. اگر بٸله يول­لارلا بير سيرا دوستلار بايراق سٸچمك پراسٸس­ينه داخيل اولماغي دوزگون گؤرورلر٬ اوندا او دٸمك دٸيل كي 30 ـ 40 ميليون­لوق بير ميلتين سيموول­لاري اٸله 20 نامعلوم و 5 معلوم ايمضا صاحيبلري­نين يازيشمالايندا موعيين­لشمه­لي­دير؟  
  3. بٸله بير پراسٸس­لره براٸت ويريليرسه٬ اوندا ميلت طالعي­نين داها هانسي استراتژي اهميتي داشايان مسٸله­لري توركجه يازا بيلمه­ين­لرين تششبوثو و نامعلوم ايمضالار داشي­يان يازيلارلار موعيين­لشمه­لي دير؟ سرحدلريميزين و اليفباميزين طالعي­نين يوخاريدا توصيف اولان وضعييته بنزر بير حالدا حل اولماسي­نا دايير آرتيق وعده وٸريميش­دير.  

 

اونيكال­ليق

ميللي بير آتريبوت سٸچمك پراسٸسي٬ ايمكان قدر تكرار اولماز يا چوخ چتين تكرار اولان اولمالي­دير. هٸچ ميللت يا او ميللته منسوب اولان قوروپلار٬ سياسي پارتيالار يا شخص­لر٬ كٸف­لري چكنده٬ ميللي سيموول يارادماق٬ سٸچمك و يا لانسه اٸتمك هوسينه دوشمورلر. بو سبب­دن ميللي سيموول­لاري سٸچمك­ يا اونلاردا ده­ييشيك­ليك اٸتمك٬ هر اؤلكه­نين آنا ياساسي­نين ان اؤنملي  بندلري كيمي اٸله چتين­لشديريلير كي٬ هلم ـ هلم اونلارا توخونماق اولماسين. دونيادا ميلت­لرين ميللي آتريبوت­لاري­نين دييشيلمه­سي نادير دن ده نادير بير حاديثه ساييلير. ميثال اوچون 2004 ـ ي ايلده گورجوستان­دا ميكاٸيل ساآكاشويلي­نين غرب يؤنلو مخمل اينقيلاب­يندان سونرا بايراق دييشمه­يه ايشاره اٸتمك اولار.

 

بو مقاله­نين مؤوضوعسونا قاييتديقدا٬ اينترنت سايت­لاريندا  بايراق سٸچيمي­له مشغول اولان دوست­لارين ايشلرينه هٸچ بير اونيكال­ليق حاكيم دٸيل­دير. باشقا سؤزله بو پراسٸس هٸچ بير تكرار اولونمامازليق­لا سجيه­لنمير. بو او دٸمك­دير كي٬ پراسٸس تكرار اولا بيلر و بو بو تكرار اولماق ميلتيميزي قونشو٬ دوست و دوشمن قارشي­سيندا گولونج وضعيت­ده قويا بيلر. تصوور اٸدين­كي حاضيركي٬ تورك ديلينده يازماقدا چين­ليك چكن بير شخص يا قوروم و اونونلا (موافق و موخاليف كيمي) موباحيثه­يه قاتيلان٬ صاحيبلري معلوم و نامعلوم اولان ايمضالار مودلي اساسيندا٬ گلن دفعه يٸني بير كامپانيا باشلانيب و تام يٸني بير رقيب بايراق سٸچمك٬ تام فرقلي آذربايجان سرحدلري موعين­لشديرمك و تزه بير اليفبا قبول اٸتمك­له نتيجه­لنه بيلر كه يوخاريدا ايلك چاغيريش­دان نقل اولان پرينسيپ­لر اساسيندا بير ـ بيرلريني قدغن اٸديب٬ ميللي محكمه­يه (؟) وٸرمكله هده­له­مكله مشغول اولا بيلرلر.  بٸله­ليكله آز زاماندا آكتيويست­لريميزين وار گوجونو هدر اٸدن­دن سونرا٬ اينترنت عالمي­ميز٬ رنگ برنگ بايراق­لار٬ خريطه­لر و اليفبالار كوللكسيونونا چٸوريليب٬ ميللي فعال­لار سيرالاريندا مأيوس­لوق و بيزي سٸومه­ينلر آراسيندا بيزه قارشي استهزا ياراداجاقدير.

 

 

 فارس شوينيزمي­ده بو وضعيت­دن ايسته­دي­يي ايستيفاد­ني اٸتمكده عاجيز قالان دٸيل­دير. بوردا بير باش وٸرميش حاديثه­يه ايشاره اٸتمك يٸرينده اولاردي: 90 ـ جي ايللرين اولينده شوبهه­لي بير وضعيت­ده شيخ خياباني و ستارخانين تبريزده مزاريني (!) سؤكمك خبري خاريجده نشر اولان آذربايجان مطبوعاتي و اوردان ميرزه خزرين رٸداكتورلوق اٸتدي­يي   ˮآزادليق“ راديوسوايله ياييلدي. او زامان ايران دؤولت­ينين كونترولوندا اولان مطبوعات٬ حيرتلنديريجي چٸويك­ليكله بو خبري نقل اٸديب   ˮپان توركيست ضيدي اينقيلابچي“لار حاقيندا استهزا اٸديجي قيصا شرحلر يازديلار.

 

يوخاريدا وصف اولان­ احولات­٬ آذربايجان توركونون ميللي وارليغي­ني سٸون هر كس اوچون اوزوجو اولمالي­دير. آمما بو او دٸمك دٸيل كي٬ ميللت­يميز مدرن٬ دموكراتيك و لاييق­لي سويه­ده عوموم ميللي قرارلار وٸرمك پراسٸسي­ايله بيگانه­دير. بؤيوك اوغورلا حياتا كٸچيريلميش ايكي اورتوقرافي سٸميناري­ني بو مدعا­نين شاهيدي كيمي گؤسترمك اولار. بو سٸمينارلاردا مرحوم عاليم­يميز اوستاد پروفسور حميد نيطقي­نين وارليق درگي­سينده ديرلي   ˮاملا قيلاووزو“ اثريله باشلاديغي علمي ايرثه داياناراق٬ بوتون عاليم­لريميزين فعال ايشتيراكي­له٬ ايملاميزي استانداردلاشديرما اوچون ديرلي قرارلار آليندي. بو موفقيتي جناب دوكتور براهني   ˮاصيل ميللي آكادمي“  ايشي كيمي ديرلنديردي. سٸمينارلاردان گونوميزه كيمي سورن ايللر بويونجا بوتون بو قرارلار مطبوعات و كيتاب نشرينده٬ ميللي تنظيمات كيمي ميزان و معيار رولونو اويناماقدا­دير. نظره آلساق كي٬ حاكميتده اولان فارس ميللتي اؤتن 85 ايل­ده بٸله بير ايشين عؤهده­سيندن گلمه­ميش­دير٬ اوندا مرحوم دوكتور زهتابي٬ جناب دوكتور هيٸت و بوتون مدنيت خاديم­لريميزين الده اٸتديكلري ناٸليت­ين عظمت­يني باشا دوشه بيلريك. اورتوقرافي سٸمينارلاري آشكارجاسينا گؤسترميشدير كي٬ عوموم ميللي قرارلار وٸرمك٬ دموكراتيك پراسٸس­ين نتيجه­لرينه سايقي­لا ياناشماق و او پراسٸس­له آلينان قرالاري حياتا كٸچيرمك  اوچون٬ ميلت­يميز يٸتگن­دير.  

 


 

در باره نویسنده:

علي رضا اردبيلي

آخرین مطالب علي رضا اردبيلي