اخبار

گونئی آزربايجاندا رفراندوم کئچیریلمه‌سی طلبی ایله

ب م ت باش کاتیبی جناب بان کی مونا

گونئی آزربايجان سیاسی قوه‌لری طرفین‌دن مراجعت

حؤرمتلي جناب باش کاتیب بان کی مون،

1813 و 1828-جی ایللرده قاجار شاهليغي (مما‌لیک محروسه) و چار ایمپئریاسی آراسیندا ایمضا‌لانان گولوستان و تورکمنچای موقاویله‌لری نتیجه‌سینده زورلا ایکییه بؤلونموش آزربایجانین بؤیوک بیر حیسه‌سی (گونئی آزربایجان) ایران آدلانان اؤلکه‌نین ایشغا‌لی آلتیندا‌دیر و اورادا یاشایان 30 میلیون‌دان چوخ آزربايجان تورکو ایللردیر کی، فارس مرکزلی رئژیم‌لر طرفین‌دن آسیمیلیاسیون و سؤمورگچی سیاسته معروض قالماقدا‌دیر.

1925-جی ایلده قاجار شاه‌لیغی‌نین چئوریلیشی ایله حاکیمیته گلن، «واحید ایران میللتی» شوعاری آلتیندا فارسلاشدیرما سیاستی‌نین بونؤوره‌سینی قویان پهلوی حاکمیتی‌نین باسقی‌سی ایله گونئی آزربايجاندا یاشایان آزربايجان تورک‌لری‌نین میللی کیم‌لیگی دانیلدی، تاریخی تحریف ائدیلدی، ایقتیصادیاتی داغیدیلدی، دیلی و کولتورو یاساقلاندی. فارس شووینیزمینه اساس‌لانان آیری-سئچکی‌لیک سیاستینه قارشی موباریزه آپاران آزربايجان تورک‌لری شاه رئژیمی‌نین تطبیق ائتدیگی ایشگنجه و حبس‌لره باخمایا‌راق، گونئی آزربايجاندا 12 دئکابر 1945–جی ایلده سید جعفر پیشه­وری‌نین باشچی‌لیغی آلتیندا آزربايجان میللی حکومتینی قورماغا نایل اولدولار. آزربايجان میللی حوکومتی­نین فعالیت گؤستردیگی 1 ایل عرضینده آزربايجان‌لی‌لارین بیر چوخ دموکراتیک فردی و اجتماعی حقوق‌لاری ایله یاناشی، آنا دیلینده تحصیل آلما حقوقو دا تٲمین ائدیلدی، پهلوی رئژیمی طرفین‌دن فارسلاشدیریلمیش آزربایجانین قدیم تاریخی یئر آدلاری برپا اولوندو.

 

 


1946
-جی ایل یانوارین 28-ده گونئی آزربايجان میللی حکومتی‌نین بانی‌سی س.ج.پیشه­وری میللت‌لرین اؤز موقددراتینی تعيي ائتمه حقوقونا اسلاانا‌راق، آزربايجان میللی حکومتی‌نین ب م ت طرفین‌دن رسمیتده تانینماسی مقصدیله ب م ت باش آسامبلیاسینا موراجيعت ائتدی. تأسف کی، ب م ت، آزربايجان میللی حکومتی‌نین بو ایسته­یینی موذاکیره‌یه چیخارما‌دان اؤنجه پهلوی رئژیمی گونئی آزربايجان اراضی‌سینه قوشون یوروده‌رک 10 مین‌لرجه آزربايجان‌لی‌نین اؤلومو ایله نتیجه‌لنن سویقیریم تؤرتدی، آزربايجان میللی حکومتینی دئویردی و گونئی آزربايجان اراضی‌سینی ایشغال ائتدی. بونونلا کیفایتلنمه‌ین پهلوی سولاله‌سی ايقتصادی، مدنی، علمی پوتئنسیا‌لی و جوغرافی مؤوقعیینه گؤره آپاریجی رولا مالیک اولان گونئی آزربايجانی هرطرفلی تنزوله اوغراتدی.

گونئی آزربايجاندا یاشایان آزربايجان تورک‌لرینه قارشی آپاریلان بو ایرقچی سیاست 1979–جو ایلدن حاکمیته گلن ایسلامی رئژیم طرفین‌دن ده فارسچی‌لیق اساسیندا داوام ائتدیریلیر. ایرانین خاریجی ایشلر ناظری علی اکبر صالحی‌نین تورکییه سفری زامانی اعتراف ائتدیگی کیمی، ایراندا اها‌لی‌نین 40 % آزربايجان تورکو اولدوغو حالدا، بو گون ده اورادا گونئی آزربایجانین اینضیباتی اراضی بؤلگوسونون دییشدیریلمه‌سی، صونعی ائکولوژی پروبلئم‌لر یاراتماقلا آزربايجان‌لی‌لارین اؤز تاریخی تورپاقلاریندان‌ مقصدلی شکیلده کؤچورولمه‌سی پلان‌لاری (اورمو گؤلونون قورودولماسی)، میللی کیم­لی­یين اینکار سیاستی ایله آزربايجان تورک‌لری‌نین آسیمیلیاسیونا معروض قالما‌لاری، اجتماعی-سیاسی فعالیت‌لره قارشی ایشگنجه و حبس‌لر داوام ائتدیریلیر
.

حؤرمت‌لی جناب بان کی موون،

گونئی آزربايجاندا 30 میلیون‌دان چوخ آزربايجان تورکو میللی-دموکراتیک حاق‌لار اوغروندا میللی آزادلیق موباریزه‌سینی داوام ائتدیرمکده‌دیرلر. گونئی آزربايجان سیاسی قوه‌لری ب م ت باش مجليسی‌نین 16 دئکابر 1966-جی ایل تاریخ‌لی 2200 A( XXİ) سایلی قطعنامه‌سی ایله قبول اولونموش “اقتصادی، سوسیال و مدنی حقوق‌لار حاقیندا” بین­الخالق پاکتا اساساً، ب م ت-نین نظارتی ایله گونئی آزربایجانین تاریخی اراضی‌سینده آزربايجان تورک‌لری‌نین ایشتیراکی ایله رفراندومون کئچیریلمه‌سینی طلب ائدیر و بو مسئله‌نین ب م ت-یه عوضو دؤولت‌لرین گونده‌لیگینه چیخاریلاجاغینا اومید ائدیرلر. اینانیریق کی، تجاووزه معروض قالمیش 30 میلیون‌دان چوخ بیر میللتین میللی، سیاسی، مدنی حقوق‌لاری‌نین تانینماسی و بشریت­ین ترققی‌سینه خیدمت ائده‌جک بیر میللی-دئموکراتیک دؤولتده یاشاماق ایسته­یی دونیا دؤولت‌لری طرفین‌دن دستک‌لنه‌جک.

سایغی‌لاریمیزلا

آزربايجان میللی دئموکارتیک بیرلیگی (بیرلیک)

آزربايجان میللی دیرنیش تشکیلاتی (آم.د.ت)

آزربايجان سوسیال دئموکرات پارتی‌سی(آس دپ)

گونئی آزربايجان دئموکرات پارتی‌سی (گادپ)

گونئی آزربايجان ایستیقلال پارتی‌سی (گایپ)

گونئی آزربايجان لیبئرال دئموکرات پارتی‌سی (گالدپ)

گونئی آزربايجان میللی آزادلیق جبهه‌سی (گاماج)

گونئی آزربايجان میللی اویانیش حرکاتی(گاموح)


11 دئکابر 2012 (21 آذر 1391)

مراجعته بیر سیرا فوتوشکیل‌لر علاوه اولونوب.